"YAAD KI KARWATE'N"

YAAD KI KARWATE'N GINWAAOO'N TUMHE'N
SOCH KI SILWATE'N DIKHAAOO'N TUMHE'N

MUJH MEN KOI HAY ADH-MARA DEKHO
SAANS KI SISKIYAA'N SUNAAOO'N TUMHE'N

IK TERI YAAD HAY UMEED E HAYAAT
TUM YEH KEHTAY HO BHOOL JAAOO'N TUMHE'N

BOLTAY LAB TUMHARA VIRD KARE'N
BAND HONTO'N SE GUNGUNAAOO'N TUMHE'N

ZOHM THA KHOOB TUMHE'N DAAWO'N PAR
MAINE SOCHA KAY AAZMAAOO'N TUMHE'N

QAUM KI ZINDAGI ANDHERI HAY
HAAKIM E WAQT AA JALAAOO'N TUMHE'N

TAA'NA-ZAN SE ZARA KAHIYO SAAQIB
AAO MAIN AAINA DIKHAAOO'N TUMHE'N